Mësime të vyera nga Profeti Muhamed s.a.s

Një ditë, një njeri erdhi te Profeti a.s dhe i tha: “Kam disa pyetje për të të bërë për këtë botë dhe për Ahiretin.”

Profeti ynë a.s i tha atij personi: “Më pyet për çfarë të duash!”

Më pas zhvillohet dialogu i mëposhtëm ndërmjet atij personit dhe Profetit tonë a.s, nga i cili mund të nxjerrim shumë mësime:

– Unë dua të jem njeriu më i pasur. Çfarë duhet të bëj? – e pyet ai.

– Nëse jeni të bindur, do të jeni nga njerëzit më të pasur. – i thotë Profeti a.s.

– Unë dua të jem më i miri i njerëzve. – i thotë ai personi.

– Njerëzit më të mbarë, janë njerëzit që janë të dobishëm. Ji i dobishëm për njerëzit. – i thotë Profeti a.s.

– Unë dua të jem më i drejti i njerëzve. – vazhdon ai.

– Nëse dëshironi për njerëzit atë që dëshironi për veten tuaj, do të jeni më të drejtët e njerëzve. – ia kthen Profeti a.s.

– Unë dua të jem një nga njerëzit më të afërt me Allahun dhe një nga robërit e Tij më të veçantë.– thotë ai.

– Nëse e kujton dhe e përmend shumë Allahun, atëherë do të jesh robi më i afërt i Allahut. – thotë Profeti a.s.

– Unë dua të jem një prej Muhsinëve, punëmirëve dhe bamirësve. – thotë ai.

– Adhuroje Zotin sikur e sheh! Edhe pse ti nuk e sheh, Ai të sheh ty.- thotë Profeti a.s

– Unë dua të përsos besimin tim.– thotë ai.

– Nëse ke moral të mirë, besimi juaj do të arrijë përsosmërinë. – i thotë Profeti a.s.

– Unë dua të ringjallem në dritë në Ditën e Gjykimit. – thotë ai.

– Mos e shtypni askënd, e do të ringjalleni në dritë në Ditën e Gjykimit. Ki mëshirë për veten dhe njerëzit së pari; Allahu ju mëshiron edhe juve. – thotë Profeti a.s.

– Unë dua që mëkatet e mia të pakësohen. – thotë ai.

– Nëse i luteni Allahut për falje për mëkatet tuaja, Allahu do t’i pakësojë ato. – thotë Profeti a.s.

– Unë dua të jem nga njerëzit më të dashur. – thotë ai.

– Nëse nuk i ankohesh Allahut për robërit e Tij, do të bëhesh më i dashuri nga njerëzit. – thotë Profeti a.s.

– Unë dua që ushqimi im të jetë i bollshëm. – thotë ai.

– Nëse vazhdon të mbash pastërti, do të kesh shumë ushqim. – thotë Profeti a.s.

– Unë dua që Allahu dhe i Dërguari i Tij të më duan mua.- thotë ai.

– Atëherë duaj atë që e do Allahu dhe i Dërguari i Tij dhe mos e duaj atë që ata nuk e duan. – thotë Profeti a.s.

– Unë dua të mbroj veten nga zemërimi i Allahut. – thotë ai.

– Nëse nuk zemërohesh me askënd, do të shpëtosh nga zemërimi i Allahut. – thotë Profeti a.s.

– Unë dua që lutja ime të pranohet. – thotë ai.

– Nëse i shmangeni haramit, lutjet tuaja do të pranohen. – thotë Profeti a.s.

– Dua që Zoti të mos më poshtërojë para të tjerëve. – thotë ai.

– Mbroni nderin tuaj dhe jini të dëlirë që të mos turpëroheni para njerëzve. – thotë Profeti a.s.

– Unë dua që Allahu të më mbulojë të metat e mia. – thotë ai.

– Nëse ju mbuloni të metat e vëllezërve tuaj, Allahu do t’i mbulojë të metat tuaja. – thotë Profeti a.s.

– Çfarë do t’i fshijë mëkatet e mia? – e pyet ai.

– Lotët, hudu (duke i shërbyer Allahut me respekt) dhe sëmundjet tuaja. – i thotë Profeti a.s.

– Cilat cilësi janë më të virtytshme tek Allahu? – e pyet ai.

– Morali i mirë, përulësia, durimi ndaj sprovave dhe pëlqimi ndaj kaderit (caktimit të Allahut). – thotë Profeti a.s.

– Cili është mëkati më i madh tek Allahu? – e pyet ai.

– Morali i keq dhe të qenurit i pabindur ndaj urdhërave të Allahut. – i thotë Profeti a.s.

– Çfarë e nxit mëshirën e Allahut Mëshirplotë? – e pyet ai.

– Dhënia e lëmoshës fshehurazi dhe sila-i rahim (lidhjet farefisnore). – thotë Profeti a.s.

– Çfarë e shuan zjarrin e xhehenemit?

– Agjërimi. – thotë Profeti a.s.

 

 

 

Burimi:  Ali el-Muttaki, Kenzu’l-Ummal, 16/127-129