Martesa e begatë e Mubarek-ut!
Nuh ibn Merjem kishte shumë pasuri, por mbi të gjitha ishte shumë besimtar. Kishte edhe një vajzë të bukur, e cila kishte besim të madh e moral të lartë. Ai mori një shërbyes, që quhej Mubarek, që s’kishte pasuri, por kishte besim dhe moral të pastër. Zotëria i tij e dërgoi që ta ruante vreshtin. Mubareku e ruajti vreshtin për gati dy muaj. Zotëria shkoi një ditë andej dhe i kërkoi një bistak rrushi. Mubareku ia solli, por rrushi ishte i thartë. Edhe herën e dytë ia solli të thartë. Zotëria u inatos, sepse kujtoi se ai po tallej me të, por Mubareku i tha se nuk po tallej. Ai nuk kishte provuar asnjë kokërr rrushi, për sa kohë kishte qëndruar aty, sepse i druhej shikimit të Zotit, e jo shikimit të krijesave.
Zotëria i tij u habit me të dhe duke parë se ai ishte njeri shumë i moralshëm e martoi me vajzën e tij. Nga martesa e tyre lindi një djalë. Kush lexon historinë e Islamit, e gjen atë djalë si dijetar të hadithit. Ai është Abdullah ibn Mubarek. Kush lë diçka për hir të Allahut, Ai ia kompenson me diçka më të mirë se ajo.
