Telefonat “rëndojnë” 27 kg mbi shpinën tonë

Ku e kemi kokën? Sot shpesh e kemi të ulur poshtë, duke kontrolluar postën elektronike, duke shkruar mesazhe, duke lundruar në internet apo duke luajtur. Tabletët dhe telefonat inteligjentë janë pjesë e pandarë e shumicës së shoqërisë moderne.

Anët pozitive të tyre janë të shumta; i përdorim për punë, për të qenë të lidhur gjithë kohës me miq e të afërm e të tjera si këto. Nga ana tjetër, nuk janë të pakta as efektet negative.

Një studim i fundit tregoi, se për çdo ditë telefoni inteligjent apo tabletët “i rëndojnë” të paktën 10 kilogram më shumë shpinës sonë dhe kjo peshë mund të rritet deri në 27 kilogram, në varësi të pozicionit që mbahet kur jemi duke i përdorur ato.

Në këtë përfundim ka mbërritur një studim i Keneth Hansraj i “Spine Surgery and Rehabilitation Medicine” në Nju Jork, i cili përllogariti “dëmin” që i bëhet shtyllës kurrizore, kur mbajmë kokën ulur, nga 15 deri në 60 gradë. Vetë pesha e kokës në pozicionin vertikal shkon nga 4.5 deri në 5.5 kilogram mbi shtyllën kurrizore, por e përkulur përpara 15 gradë e më shumë dhe e ndihmuar nga graviteti, atëherë presioni që ushtrohet mbi shtyllën kurrizore, shkon deri në 27 kilogram.