Një e vërtetë e hidhur
“Çdo fëmijë që lind, lind me natyrë islame, pastaj prindërit e bëjnë atë krishter, çifut ose zoroastrian.”
Po, çdo fëmijë që lind, lind me një natyrë të pastër e të përshtatshme për t’u bërë gjithçka, pastaj ju dorëzohet prindërve për t’i zhvilluar dhuntitë dhe aftësitë. Kështu, fëmijët, në përputhje me atë ç’janë prindërit e tij, bëhen ose krishterë, ose çifutë, ose adhurues të zjarrit, zoroastrianë.
Në mënyrë të veçantë në ditët tona, meqë prindërit janë kredhur me gjithçka në punët e kësaj bote, duket se i kanë braktisur fëmijët plotësisht. Madje është e pamundur të tregohet një shekull tjetër kur fëmijët të jenë lënë pas dore sa në këtë shekull.
I Dërguari i Allahut (s.a.s.) jep një ferman me këto fjalë: “Në Kohën e Fundme, mjerë për fëmijët për shkak të baballarëve!” Sahabet e pyesin të habitur:
– U goditën për shkak të baballarëve politeistë dhe humbën?
– Jo, baballarët besimtarë i vranë ata!
– Si ndodhi, o i Dërguari i Allahut?
– Baballarët s’ua mësuan atyre shtyllat e fesë!
Këtë hadith, porosi profetike, mund ta shtjellojmë shkurtimisht kështu:
Shtyllat e fesë u braktisën për këtë botë të vogël. Ata që e patën për detyrë, e nënvleftësuan krejtësisht edukimin fetar duke i përqëndruar të gjitha përpjekjet vetëm për jetën materiale. Ata e lanë mënjanë jetën ndjesore e shpirtërore për interesa të një bote të vogël. Nuk i dhanë rëndësi mësimit të njohurive fetare duke menduar se këndimi i Kur’anit, mësimi dhe njohja e frymës së tij, mësimi dhe praktikimi i fesë na marrin kohë.
Kuptimi i hadithit të mësipërm paraqet një përputhje të plotë me këtë ajet:
“Jo, jo, ju e pëlqeni shumë atë që e ka shpërblimin dhe kënaqësinë të çastit, kurse ahiretin (përfundimin e kësaj) e nënvleftësoni!” (Kur’ani, Kijame, 75/25)
I Dërguari i Allahut e vazhdon fjalën e tij kështu: “Unë s’kam të bëj me ta, as ata mos paçin të bëjnë me mua!”
Me fjalë të tjera, ai do të thotë: “Unë s’kam të bëj me ata prindër që e lënë pas dore fëmijën, që i mbyllin sytë para humbjes së fëmijës, për më tepër, që nuk dridhen përballë shkatërrimit të një brezi; edhe ata mos paçin të bëjnë me mua!”
© URTËSI.AL