Miqtë dhe armiqtë e Iblisit të mallkuar

Vehb b. Munebbihu ka thënë: “Allahu e urdhëroi Iblisin të shkojë te Muhammedi s.a.v.s. dhe t’i japë përgjigje për çdo gjë që ai do ta pyesë. Ai erdhi te i Dërguarit s.a.v.s. në formë të një plaku me shkop në dorë.

I Dërguari s.a.v.s. e pyeti: “Kush je ti?”

Ai i tha: “Unë jam Iblisi.”

“Pse ke ardhur?” – i tha Profeti s.a.s.

“Allahu më ka urdhëruar të vij te ti dhe të përgjigjem në të gjitha pyetjet që do të më pyesësh’.- u përgjigj Iblisi.

I Dërguari s.a.v.s. i tha: “O i mallkuar, sa armiq ke në ummetin tim? “

Ai tha: “Pesëmbëdhjetë kategori njerëzish, prej të cilëve ti je i pari.

 I dyti është imami-prijësi i drejtë.

I treti është pasaniku i përulur.

I katërti është tregtari i sinqertë.

I pesti është dijetari i penduar.

I gjashti është besimtari dashamirës.

I shtati është besimtari zemër mëshirues.

I teti është i penduari i cili është i qëndrueshëm në teuben e tij.

I nënti është ai i cili largohet prej haramit.

I dhjeti është besimtari i cili kujdeset që përherë të jetë i pastër.

I njëmbëdhjeti është besimtari i cili jep shumë sadakë.

I dymbëdhjeti është besimtari i cili ka sjellje të mirë me njerëzit.

I trembëdhjeti është besimtari i cili u bën dobi njerëzve.

I katërmbëdhjeti është hafëzi i cili lexon shumë Kur’an.

I pesëmbëdhjeti është ai njeri i cili zgjohet natën dhe falë namaz kur njerëzit e tjerë flenë.

Pastaj i Dërguari s.a.v.s. e pyeti: “E cilët janë shokët e tu prej ummetit tim?”

Ai tha: Ata janë dhjetë kategori:

I pari prej tyre është sundimtari i padrejtë.

I dyti është pasaniku mendjemadh.

I treti është tregtari mashtrues.

I katërti është alkoolisti.

I pesti është ai i cili bartë fjalë dhe bën çrregullime.

I gjashti është i pamoralshmi.

I shtati është ai i cili e shfrytëzon pasurinë e jetimit.

I teti është ai i cili nuk kujdeset posaçërisht për namazin dhe ai që luan me namazin.

I nënti është ai i cili nuk jep zekat.

I dhjeti është ai i cili ka shpresë afatgjatë.

Këta janë vëllezërit dhe shokët e mi”.