Tre fjalët që njerëzit i kundërshtojnë
Përgjithësisht, fjalët e njerëzve janë shumë hapa para veprave të tyre. Njeriu e ka të lehtë që me gjuhë të pretendojë, por të vështirë që t’i veprojë atë që thotë. Sikur të ishim më të vetëdijshëm për kuptimin e fjalëve që nxjerrim nga goja, do t’i kursenim më shumë ato. Fjalët e pakta janë përgjegjësi e paktë përpara Zotit dhe mundësi për të punuar më shumë.
Më poshtë do të përmendim tre shprehje, që i përmend shumica e njerëzve, por që janë neglizhentë ndaj kuptimit të tyre. Këto shprehje janë të përhapura gjerësisht, kuptimi i tyre merret si i mirëqenë dhe nuk reflektohet mbi madhështinë e tyre.
Shakik el-Belhi (r.a) ka thënë: “Njerëzit i thonë këto tre shprehje, por veprimet e tyre bien ndesh me to. E para; “Ne jemi robërit e Allahut.” E thonë këtë gjë, por sillen sikur janë lënë të lirë dhe pa përgjegjësi. Kështu me veprimet e tyre e kundërshtojnë këtë gjë.
E dyta; “Allahu është garantuesi i furnizimit tonë.” E thonë këtë gjë por zemra e tyre është e lidhur me këtë botë dhe kënaqet vetëm me të mirat e grumbulluara prej saj. Sërish veprat e kundërshtojnë fjalën e tyre.
E treta; “Nuk ka shpëtim prej vdekjes.” E thonë këtë gjë dhe sillen sikur do të jetojnë përjetësisht në këtë botë dhe sikur s’ka vdekje. Edhe në këtë gjendje sërish bien ndesh me pretendimin e tyre.
Vëllai im, shihe mirë veten! Me cilin trup do të dalësh përpara Zotit, me cilën gjuhë do t’i përgjigjesh Atij, në ditën kur do të pyetesh hollësisht për çdo gjë?
